Rrugët në Shqipëri kanë marrë shumë jetë njerëzish. Aksidentet e shtuara, pakujdesia në drejtimin e mjeteve, tejkalimi i shpejtësisë, parakalimi i gabuar, janë disa nga shkaqet më të shpeshta në aksidentet rrugore. Kujtojmë ngjarjen e rëndë të Shkodrës, ku humbën jetën 4 persona pas përplasjes tragjike në Velipojë.
Gjithashtu rrugët shqiptare janë përgjakur edhe më pas. Aksidenti në Kavajë ku makina përplasi për vdekje nusen dhe vjehrrin e saj buzë kryqëzimit të Mali i Robit. Ndërkohë aksident tjetër i frikshëm ishte ai i Maminasit ku mbeti e vrarë një vajzë e re dhe taksisti me të cilin po udhëtonte. Rendisim se ngjarjet dhe aksidente nuk kanë munguar edhe në aksin rrugor Elbasan-Librazhd.
Aksi nacional Elbasan-Librazhd është kthyer në makth për banorët e Labinotit Fushë. Mungesa e sinjalistikës, tejkalimi i shpejtësisë mungesa e ndriçimit, nënkalimeve apo mbikalimeve këtu po merr çdo ditë jetë njerëzish, kryesisht kalimtarë të cilët nuk kanë asnjë zgjidhje tjetër përveç se të ndajnë të njëjtën rrugë me automjetet.
Një natë më parë, një 74-vjeçar gjeti vdekjen sapo doli nga shtëpia teksa u përplas nga një automjet, drejtuesi i së cilës u largua nga vendngjarja.
Ky nuk është rasti i parë që Top Channel trajton rrezikshmërinë e këtij aksi rrugor, por deri tani asnjë masë nuk është marrë dhe situata këtu mbetet e njëjtë.
Rreth 5 vite më parë, Arif Qosja u përplas nga një automjet në këtë segment, ai shpëtoi për mrekulli kur edhe mjekët nuk i dhanë shpresë për jetën, sot ai dhe banorë të tjerë të Labinotit bëjnë apel që të ndërhyhet sa më parë për të shpëtuar jetën e banorëve të kësaj zone.
