Instituti i Statistikave ka publikuar raportin “Indeksi i Çmimeve të Prodhimit”, për tremujorin e dytë të 2017-ës.
Ajo që bie në sy është rritja e indeksit të çmimeve të prodhimit me 1,6% krahasuar me tremujorin e dytë të vitit 2016.
Sipas raportit, rritjen më të lartë e kanë shënuar çmimet e prodhimit në seksionin “industri nxjerrëse”me 8,2 %.
Brenda kësaj industrie vihet re rritja e çmimeve të prodhimit të produkteve në nxjerrjen e naftës bruto dhe gazit natyror me 12,0 %.
Duke krahasuar të njëjtën periudhë, çmimet e prodhimit në aktivitetet e industrisë përpunuese kanë shënuar rritje me 1,2 %, ku vihet re rritja e çmimeve të prodhimit të produkteve në aktivitetin e metalurgjisë me 5,3 %, prodhimi i produkteve kimike me 5,1 %, konfeksionimi i veshjeve me 0,6 %.
Gjithashtu pësuan rritje edhe çmimet e prodhimit të produkteve vendase me 1,9% krahasuar me tremujorin e dytë të vitit 2016.
Çmimet e prodhimit të produkteve për eksport kanë shënuar rritje me 3,3 %, krahasuar me të njëjtën periudhë të vitit të mëparshëm.
Indeksi i Çmimeve të Eksportit arriti 104,6 % duke shënuar ulje me 1,4 %, krahasuar me tremujorin e mëparshëm. Çmimet e prodhimit të produkteve në seksionet: “industri nxjerrëse” dhe “industri përpunuese” kanë shënuar ulje përkatësisht me 5,4% dhe 0,3%.
