Kryeministri Edi Rama e ka cilësuar raportin e ministrave teknikë mbi zgjedhjet parlamentare të 25 qershorit si krejt të pavend.
Sipas tij, kjo komprometon gjithçka të mirë që u ndërtua në funksion të zgjedhjeve.
“Një epilog krejt i pavend që komprometon gjithçka të mirë që u ndërtua në funksion të zgjedhjeve më të mira që Shqipëria ka zhvilluar ndonjëherë”, thuhet në njoftimin për shtyp të kryeministrit Rama.
Për kryeministrin është një raport “jo teknik e joprofesional i Task-Forcës”. Përmes një postimi në Facebook, Rama e quajti raportin, “dokument i njëanshëm dhe politik”
Rama e mbyll duke i uruar shëndet, e suksese të mëtejshme ministrave teknikë të cilëve i shprehu mirëkuptimin e tij të plotë, “qoftë për disa gafa të bujshme e krejt të panevojshme pas zgjedhjeve në sektorin e arsimit, qoftë për mbytjen në fund fare në lugën e ujit të politikës, prej ku ka dalë edhe raporti i njëanshëm, jo teknik e jo profesional i Task-Forcës”.
Reagimi i kryeministrit Rama
Dukë i falënderuar ministrat teknikë të Partisë Demokratike për kontributin e dhënë dhe posaçërisht zëvendëskryeministren për rolin konstruktiv e për nivelin profesional në drejtimin e Task-Forcës për zgjedhjet, kryeministri Edi Rama shpreh keqardhjen për përmbylljen e kësaj eksperience pozitive më të ashtuquajturin Material përmbledhës për marrjen e masave dhe monitorimin e veprimtarisë, sjelljes apo përdorimit të burimeve njerëzore, financiare dhe logjistike të administratës shtetërorë, gjatë procesit zgjedhor për zgjedhjet e Kuvendit të Shqipërisë për vitin 2017.
Raporti në fjalë fatkeqësisht komprometon si një epilog krejt i pavend, gjithçka të mirë u ndërtua në funksion të zgjedhjeve më të mira që Shqipëria ka zhvilluar ndonjëherë. Ky raport është një dokument politik, krejt i njëanshëm dhe aspak në nivelin e lartë profesional të zëvendëskryeministres teknikë, si drejtuese e Task- Forcës në fjalë.
Sidoqoftë, kryeministri i falënderon ministrat teknikë për gjithçka të mirë bënë apo u përpoqën të bënin gjatë mandatit të tyre të posaçëm.
Duke u shprehur mirëkuptimin e tij të plotë, qoftë për disa gafa të bujshme e krejt të panevojshme pas zgjedhjeve në sektorin e arsimit, qoftë për mbytjen në fund fare në lugën e ujit të politikës, prej ku ka dalë edhe raporti i njënshëm, jo teknik e jo profesional i Task-Forcës, kryeministri Edi Rama u uron zonjave e zotërinjve të dorëhequr shëndet e suksese të mëtejshme në jetë!
