Gazetari Erl Murati, ka folur mbi gjetjet e OSBE-ODIHR, për zgjedhjet e 30 qershorit, teksa u shpreh se rekomandimet e këtij institucioni janë kërkuar nga ndërkombëtarët para dy dekadave, por për fat të keq asgjë nuk ka lëvizur.
I ftuar në emisionin “Kjo Javë” në News24, Murati deklaroi se njolla më e zezë e raportit ishte politizimi i KQZ dhe Kolegjit Zgjedhor.
“Raporti i OSBE/ODIHR ishte nga më negativët në 20 vitet e fundit. Raporti nuk thotë diçka që ne nuk e dimë. Është e kotë që të dyja palët këndojnë fitore. Kriza politika vijon të qëndrojë këmbëkryq . Ka disa njolla të zeza. Fakti që këtu kanë ndodhur zgjedhje monopartiake. Në 61 bashki nuk ka pasur garë dhe kjo është padyshim që është njolla më e zezë. Politizimi i KQZ, Kolegjit Zgjedhor, mungesa e transparencës së burimeve financiare. Njolla kryesore ishte se nuk patur kandidaturë. Dy kanë qenë dy kërkesat e faktorit ndërkombëtar: Reforma në drejtësi dhe ajo e reformës zgjedhore. Ndryshimi i kodit zgjedhor nuk garanton zgjedhje të lira dhe të ndershme. Nëse do të zbatohet Kodi Zgjedhor aktual dhe Kodi Penal aktual, atëherë mund të kishte”, tha ai.
Sipas Muratit, e vetmja mënyrë që opozita të vijë në pushtet, është që të nisë sa më parë garën kundër maxhorancës.
“Kriza në Shqipëri është krizë vertikale dhe horizontale. Këtu mungojnë instrumentet kryesorë të shtetit. Mungesa e tyre është një problematikë që prek çdo suazë të jetës. Nisja e dialogut është e vetmja mënyrë se si mund të zgjidhet kriza. Unë nuk mendoj se dorëheqja e Ramës nuk do ishte zgjidhje. Ka ardhur koha që opozita të jetë në garë. Opozita e bashkuar është shumicë dhe ky është perceptim im si gazetar. Forcat e opozitës së bashkuar janë në një avantazh të lehtë përballë maxhorancës. Edi Rama sado diktator të jetë, largimi i tij bëhet vetëm më zgjedhje dhe garë”, u shpreh gazetari.
