Banka Botërore dhe rrjeti prestigjioz PwC kanë publikuar një raport, i cili quhet “Pagesa e Taksave 2018”, ku Shqipëria paraqitet si një nga vendet me burokracitë më të komplikuara në drejtim të taksave, si dhe me taksat më të larta në rajon, pas Serbisë.
Në raport rezulton se Shqipëria është e 125-ta në botë ndër 190 ekonomi të ndryshme për pagesën e taksave.
Shqipëria ka bërë hapa prapa krahasuar me një vit më parë, kur renditej në pozicionin e 97-të në botë, ndër 189 ekonomi të ndryshme.
Ky përkeqësim vjen si pasojë e rritjes së barrës së taksave për biznesin, nga 36.5% vjet, në 37.3% këtë vit. Madje, në këtë drejtim vendi ynë është mjaft larg mesatares rajonale, që fiksohet në 33.4%.
Shqipëria renditet e parafundit në të gjithë rajonin, të Europës Lindore dhe Azisë qendrore, me plot 35 taksa për të paguar, ndërsa nga ana tjetër në vendin e dytë pas Bosnje Hercegovinës, me 5 taksa mbi fitimin.
