Instituti i Statistikave ka publikuar sot raportin “Statistikat e Krimeve”, për tremujorin e dytë të vitit 2017.
Sipas këtyre të dhënave, rezulton se për tre muaj janë kryer 8.393 vepra penale, ndërsa janë regjistruar 8.855 autorë.
Sipas INSTAT, numri i veprave penale në këtë periudhë ka rënë me 6.1%, ndërsa numri i autorëve është ulur me 8.3%, krahasuar me tremujorin e dytë të vitit 2016.
Por, cilat janë veprat më të shumta penale që kanë kryer shqiptarët në tremujorin e dytë të 2017-s?
Pjesën më të madhe të veprave penale e zënë:
- “Krimet kundër autoritetit të shtetit” me 39,6%,
- “Krimet kundër pasurisë dhe në sferën ekonomike” me 38,2%
- “Krimet kundër personit” me 20,1%.
DETAJET PËR SECILIN LLOJ TË VEPRAVE PENALE MË TË SHPESHTA:
Vepra penale kundër personit:
Gjatë tremujorit të dytë 2017 janë kryer 1.688 vepra penale kundër personit, duke pësuar ulje me 8,3 %, në krahasim me tremujorin e dytë 2016. Numri i autorëve të krimeve kundër personit, në këtë periudhë është 1.989, dhe përbën 22,5 % të totalit të autorëve. Gjatë tremujorit të dytë 2017, numri i autorëve të kësaj vepre penale është ulur me 9,3 %, në krahasim me të njëjtën periudhë të vitit të kaluar.
Vepra penale kundër pasurisë dhe në sferën ekonomike:
Në tremujorin e dytë 2017 janë kryer 3.205 vepra penale “Krimet kundër pasurisë dhe në sferën ekonomike”, duke pësuar ulje me 2,7 %, krahasuar me tremujorin e dytë 2016. Autorët e tyre janë 2.928, rreth 9,1 % më pak se në të njëjtën tremujor të një viti më parë dhe përbëjnë 33,1 % të totalit. Në këto vepra penale, seksioni Vjedhjet e pasurisë zë 37,5 % të totalit. Krahasuar me tremujorin e dytë 2016, gjatë këtij tremujori vjedhjet e pasurisë kanë pësuar një ulje me 26,3 %.
Veprat penale kundër autoritetit të shtetit:
Në tremujorin e dytë 2017 janë kryer 3.321 vepra penale, me një rënie prej 9,5 %, në krahasim me tremujorin e dytë 2016. Numri i autorëve gjatë tremujorit të dytë 2017, është 3.676, duke shënuar një ulje me 9 %, në krahasim me të njëjtën periudhë të vitit të kaluar. Veprat penale kundër rendit dhe sigurisë publike, përbëjnë përqindjen më të madhe të veprave kundër autoritetit të shtetit, me rreth 76,6 %, duke regjistruar një ulje prej 13,3 %, në krahasim me të njëjtën periudhë të një viti më parë.
Masat e sigurisë:
Gjatë tremujorit të dytë 2017, numërohen 8.855 masa sigurie për autorë të veprave penale, nga 9.661 që ishin në të njëjtën periudhë të një viti më parë, duke pësuar një ulje me 8,3 %.
