Ralf Rangnick i pëlqen ideja e një përvojë italiane, por zbarkimi i tij te Milan është ende larg zyrtarizimit. Teksa palët studiojnë akordin, gjermani duket se po harton një listë lojtarësh të cilët do të mundohet ti veshë kuqezi në rast se emërohet në krye të “Djallit”.
Në kokën e trajnerit ka shumë emra talentesh që premtojnë shumë, por gjithashtu edhe ndonjë element tashmë të afirmuar. Për sulmin profili ideal do të ishte ai i Timo Werner. 27 gola në 36 ndeshje sezonale shënojnë kulmin e karrierës për sulmuesin që prej kohësh monitorohet edhe nga Liverpool, me kërkesë të posaçme të trajnerit Jurgen Klopp.
Për të siguruar 24 vjeçarin do të duhej një investim i madh, por në gjetjen e formulë mund të ndihmojë pikërisht Rangnick që me Leipzig ka raporte fantastike.
Ishte pikërisht 54 vjeçari që katër sezone më parë bëri të mundur blerjen e Werner te Stuttgart për 14 milionë euro. Tashmë bomberi vlen katër herë më tepër, por kjo nuk do ta ndalojë Rangnick të mundohet ta marrë nën urdhrat e tij te Milan.
