Kryetari i partisë “Zgjidhja”, Koço Kokëdhima, e ka cilësuar Ramush Haradinajn si një luftëtar dhe burrë shteti të Kosovës. Kështu e nis opinionin e tij, të cilën e ka shpërndarë në rrjetin social Facebook.
Ai thotë se Haradinaj dha dorëheqjen si kryeministër, për t’u mbrojtur si qytetar përpara Gjykatës Speciale të Hagës, pas akuzave për krime lufte. Kokëdhima vlerëson veprimin e Haradinajt, duke e konsideruar si të drejtë dhe sfidues ndaj akuzave të padrejta që i janë bërë.
“Ramush Haradinaj dha sot dorëheqjen si kryeministër për t’u mbrojtur si qytetar përpara Gjykatës Speciale të Hagës, pas akuzave për krime lufte. ‘Kam njoftuar institucionet se kam dhënë dorëheqje të parevokueshme. Arsyeja është se kam marrë një ftesë nga Gjykata Speciale për javën e ardhshme si i dyshuar. Dhe kam vlerësuar se nuk mundem të paraqitem si kryetar i qeverisë, por si qytetar i Kosovës’,- deklaroi Haradinaj.
‘Zgjidhja’ e vlerëson veprimin e z.Haradinaj si të drejtë dhe sfidues ndaj akuzave të padrejta që i janë bërë. Kjo nuk është e para herë që ai duhet të përballet me akuza të tilla, që nuk mungojnë për shumicën e figurave politike të Kosovës, por, fatkeqësisht, jo ndaj atyre të Serbisë.
Ramush Haradinaj dhe familja e tij, si shumë të tjera në Kosovë, kanë dhënë gjithçka kishin për shtetin e lirë dhe të pavarur. Akuzat ndaj tyre janë përpëlitjet e fundit të politikës shoviniste serbe që ende flet për Kosovën e pavarur prej 11 vitesh si ‘djepi i Serbisë’ dhe bën plane me antishqiptarët për këmbime territoresh.
Z.Haradinaj ka treguar shqiptari dhe burrështetësi, në postin e kryeministrit të Kosovës, me vendosjen e taksës 100 për qind ndaj mallrave serbe dhe boshnjake, dy vendeve që sabotojnë ku të munden Kosovën e pavarur si dhe me kundërshtimin e vendosur ndaj marrëveshjes për ndryshimin e kufijve dhe të këmbimit të territoreve mes Kosovës dhe Serbisë.
‘Zgjidhja’ beson se z.Haradinaj do të dijë të mbrojë veten dhe të gjithë luftëtarët e Kosovës së lirë përballë akuzave të pabaza dhe do të rikthehet sa më parë në drejtimin e qeverisë së Kosovës”.
