Kryeministri Edi Rama paraqiti pasditen e sotme platformën e tij të qeverisjes me qytetarët. Kreu i qeverisë tregoi se si do të përvijohet qeverisja e tij me qytetarët. Kryeministri theksoi se qytetarët do të kenë të drejtë të kërkojnë interpelancë qeveritarëve nisur që nga ai vetë deri tek ministrat e kabinetit për një çështje me interes kombëtar dhe që është në dobi të qytetarëve, të cilën Rama e cilësoi si konsultim i hapur publik.
“Do tu japim mundësinë njerëzve që të thërrasin në interpelancë kryeministrin dhe ministrat. Duhet një numër i caktuar i njerëzve që për një problem të nxehtë kombëtar dhe me rëndësi të madhe të kërkojnë interpelancë sipas tematikës që qytetarët e regjistruar e kërkojnë. Po ashtu në platformë mund të kenë akses për të lexuar dhe reaguar do të jenë anëtar aktiv të koalicionit”, u shpreh Rama.
Një ide të tillë e shprehu kreu i Partisë Demokratike, Lulzim Basha përgjatë fushatës elektorale të zgjedhjeve të fundit parlamentare. Ideja politike e Bashës lidhej me modelin “recall” ku qytetarët iu kërkojnë llogari të zgjedhurve të tyre dhe me anë të një numri të caktuar qytetarësh, ata kanë të drejtë të shkarkojnë deputetët dhe ministrat. Por, kryeministri Rama nuk ka shkuar deri në këtë pikë, të cilën siç duket do ta lërë për një moment të mëvonshëm, ndoshta edhe si formë presioni ndaj ministrave dhe të zgjedhurve në parlament. Në këtë mënyrë, kryeministri Rama nuk e përfshiu në qeverinë e re kryedemokratin Basha, siç aludohej shpesh që nga marrëveshja e 18 majit, por idetë politike të tij po fillon t’i zbatojë si pjesë e plaftmorës së tij qeverisëse për katër vitet në vazhdim.
“Qytetarët do të kenë mundësi të shkarkojnë deputetin e tyre nëse nuk mban premtimet. Nëse një i zgjedhur abuzon me pushtetin, qytetarët nuk duhet të presin zgjedhjet që të vendosin për të. Kjo quhet “recall”. Nëse nuk mban premtimet dhe nëse nuk përfaqëson njerëzit, atëherë njerëzit do të kenë të drejtën që të të shkarkojnë. Kjo do të jetë me Kushtetutë. Modeli më i avancuar është modeli recall, ku karriera e politikanit do të lidhet me vullnetin e qytetarëve”, u shpreh Basha gjatë fushatës elektorale për zgjedhjet e fundit parlamentare.
Ndër pikat e tjera të platformës së qeverisjes së tij me qytetarët Rama evidentoi edhe modelin e start-upeve, ku qytetarët mund të paraqesin një ide të caktuar dhe pas 20 ditëve çdo qytetar do të marrë përgjigje nëse ideja e tij ka dobi për komunitetin dhe nëse është e realizueshme.
https://www.facebook.com/edirama.al/videos/10155202563461523/
