Kryeministri Rama ka urdhëruar kreun e Policisë së Shtetit, Ardi Veliu, që të arrestojë sa më shpejt Klemend Balilin. Ky i fundit është personazhi i shndërruar në emblemë për rendin në Shqipëri. Ai rezulton i arratisur që nga maji i vitit 2016. Emri i tij u nxor nga autoritetet greke si trafikant droge, pjesë e grupit të quajtur “Eskobari i Ballkanit”.
Ish-drejtori i LSI-së, prej atëherë nuk dihet se ku ndodhet. Çdo tentativë për të kapur ka rezultuar një dështim deri më tani. Ish-ambasadorit Lu, në pothuajse çdo dalje për media lakmonte emrin e Klemend Balilit, bashkë me disa emra të tjerë. Ai fliste për to, në mesazhet që ish-përfaqësuesi i Uashingtonit në Tiranë i përcillte qeverisë, në formë vërejtjeje.
“Nuk dua i dashur drejtor i Përgjithshëm i Policisë së Shtetit, të na përmendë ambasadorja e re amerikane se kemi ende pa arrestuar Klemend Balilin. Ashtu si nuk dua të jenë në detyrë drejtorë e shefa, në zona apo pika ku uniforma dhe dinjiteti vihet në diskutim nga persona të tillë dhe makinat e pordhës së tyre, po as nga kundërvajtësit që gërryejnë lumenj, presin pemë, hedhim inerte”.
Ky është mesazhi i Ramës për kryepolic Ardi Veliun, përcjellë në një takim me kupolën e Policisë së Shtetit.
Por ka një koinçidencë në këtë mes. Veliu e Balili, mund të themi se janë bashkëfshatarë. Që të dy janë nga Delvina, vendlindjet e tyre janë jo larg njëra-tjetrës.
Pra, Ardi Veliu ka para dhe një sfidë lokale, pasi duhet të gjejë dhe arrestojë një njeri të zonës së tij.
Duhet parë në vijim se çfarë efekti do ketë ultimatumi i Ramës për një delvinjot në majën e Policisë së Shtetit. Ai duhet të vërë në pranga një delvinjot, më të kërkuarin nga policia./TIRANA TODAY/
