Edhe pse u tha që do të nisej në drejtim të Italisë, kryeministri Edi Rama ka mbërritur para pak minutash në godinën e Kuvendit, për të marrë pjesë në seancën plenare, e parashikuar të mbahet në orën 10:00.
Rama është parë duke hyrë me makinë deri në oborrin e godinës. Gjithashtu, më herët, në Kuvend kanë hyrë edhe deputetë të rinj nga lista e LSI-së, të cilët pranuan të merrnin mandatet e dorëzuara.
Edhe deputetët e PS-së kanë mbërritur rreth një orë para nisjes së seancës plenare, për të shmangur çdo përplasje me protestuesit.
Ndërkohë, kryetari i opozitës Lulzim Basha mësohet se ka hyrë në selinë e PD-së, prej nga do të niset për të drejtuar protestën. E gjithë zona përpara Kuvendit është e rrethuar nga hekura dhe policë, ndërsa për të shmangur hyrjen e qytetarëve në Parlament, do të përdoren fillimisht uji dhe më pas gazi lotsjellës.
