Pa më të voglin dyshim, tema më e diskutuar dje në të gjitha mediumet shqiptare ka qenë paketa Anti-KÇK dhe forca e re OFL.
Shumë analistë shqiptarë kanë shfaqur haptazi dyshimet e tyre, duke konsideruar mundësinë që kjo forcë e re dhe akti normativ mund të instrumentalizohen në duart e pushtetit. Disa syresh e kanë quajtur thjesht nje “tullumbace” propagande.
Sakaq, kryeministri Rama sot me anë të një postimi në Twitter ka komentuar mbi reagimet negative, duke iu referuar qëndrimeve të opozitës dhe analistëve.
Sipas tij, ligji special mbron sakrificat e policisë, të nëpërkëmbura ndër vite nga gjyqtarët dhe prokurorët e korruptuar.
Reagimi i plotë:
Jo vetëm PD po edhe plot të ashtuquajtur analistë e komentatorë po i kundërvihen antiKÇK-së, në një përçartje kolektive brenda kutisë së televizorit! Sepse për ta krimi është ushqimi i politikës e audiencave së tyre kundër qeverisë dhe mes krimit e qeverisë ata zgjedhin krimin.
AntiKÇK është reagimi i duhur në kohën e duhur, kur puna e sakrificat e policisë poshtërohen nga prokurorë & gjykatës të korruptuar, të cilët janë partnerë të krimit jo nuk dënojnë, po lirojnë vrasës e trafikantë të dënuar dhe punojnë të kapin ç’të kapin para se t’i fshijë Vetingu.
Ligji Special është frymëzuar nga dashuria për këtë vend dhe vullneti i hekurt për të shkatërruar burimet financiare të krimit, duke marrë shembull nga historitë e suksesit të vendeve si Italia e Britania e Madhe që me ligjet speciale goditën në zemër mafian apo terrorizmin.
Koha do të provojë përsëri edhe njëherë se dashuria për vendin, vullneti për ta bërë shtet modern Shqipërinë, vendosmëria për t’i rënë me kokë mureve të vjetra, do të fitojnë mbi hipokritët, dembelët e parazitët që jetojnë me llafe, gënjeshtra e broçkulla duke helmuar shqiptarët!
