Duke krahasuar protestën e së shtunës së opozitës së bashkuar me 21 janarin, kryeministri Rama tha se nuk mund të thuhet që janë të gjithë njësoj.
Rama foli troç mbi incidentin e bujshëm të 11 majit, ku efektivët e policisë dhunuan Sahit Dollapin, sekretar organizativ i PD-së.
Kryeministri tha në konferencën me gazetarët se për këtë u bë nami, por po të ishte në pushtet e djathta, sot nuk do mbahej konferencë, por do mbahej marshim për protestuesit e vrarë, siç ndodhi më 21 janar, kur PS ishte opozitë.
“Për tre shkopinj gome në shpinën e Sait Dollapit, bëhet nami, po të ishin ata do ishin vrarë disa veta. Nuk jemi të gjithë njësoj, po të ishim njësoj do mbanim ndonjë marshim për të vrarë që nga e shtuna. Thashë që në 21 janar nuk është gjuajtur asnjë lloj bombe molotov në drejtim të këtyre mureve.”
