Në një komunikim me qytetarët me anë të rrjeteve sociale, kryeministri Edi Rama ka bërë me dije se gjendja e emergjencës do të zgjatet pas datës 25 prill. “Patjetër që do të zgjatet gjendja e emergjencës pas 25 prillit”, iu përgjigj Rama një prej qytetarëve.
Po kështu, kryeministri ka sqaruar lejen në e-Albania, që duhet marrë për vizitat mjekësore. Ai sqaroi se leja nuk është për rastet urgjente, por për vizitat e planifikuara. Kreu i qeverisë shtoi më tej se me vendosjen e takimeve online, është bërë e mundur që të ulet fluksi në urgjencë.
“Kam dëgjuar shumë komente lidhur me marrjen e lejes për vizitat mjekësore tek e-Albania. Nuk janë për raste urgjence, por për marrje leje, për të gjithë ata që kanë planifikuar takime me mjekët.
Edhe pa ndodhur kjo situatë, e kemi përsëritur. Urgjencën nuk e përcakton askush. Por e përcakton urgjenca dhe numri 112. Aty shihet nëse ti je vërtet sëmurë, apo thjesht të dhemb koka.
Me vendosjen e takimeve online, është bërë e mundur të ulet fluksi në urgjencë. Është urgjenca kombëtare që ka për detyrë të thotë prit; ose erdhëm. Se po të ishte kështu, të gjithë shqiptarët do të thoshin, po ikim se kam urgjencë.
Ndërsa leja, çdokush që ka vizitë në spital, do të marrë një leje. Ta ketë me vete që po bën vizitë, dhe jo se ka dalë për xhiro e punë të tjera”, shtoi kryeministri.