Kryeministri Edi Rama u ka bërë thirrje naftëtarëve të Ballshit që ta ndërpresin grevën, pasi sipas tij është e panevojshme.
Ai i ftoi ata që të ulen me të dhe të bisedojnë, por pa bërë presione e ultimatume.
”U përsëris naftëtarëve të Ballshit që greva e tyre është e panevojshme, sepse unë jam me ta dhe qeveria është e tyrja! Ne jemi plotësisht të ndjeshëm ndaj hallit të tyre që është edhe halli ynë dhe është absurde që hallin t’ua qajnë ata që ua shkaktuan!
I ftoj vëllazërisht ta ndërpresin grevën dhe jam i gatshëm të ulem e të bisedoj me ta për këtë hall të përbashkët, por jo kështu!Kështu jo, sepse presionet e ultimatumet nuk funksionojnë në asnjë familje dhe punëtorët e Ballshit nuk bëjnë përjashtim nga ky parim i panegociueshëm!’’, shkruan Rama në Twitter.
U përsëris naftëtarëve të Ballshit që greva e tyre është e panevojshme, sepse unë jam me ta dhe qeveria është e tyrja! Ne jemi plotësisht të ndjeshëm ndaj hallit të tyre që është edhe halli ynë dhe është absurde që hallin t’ua qajnë ata që ua shkaktuan!
— Edi Rama (@ediramaal) October 19, 2020
Prej 22 ditësh, naftëtarët ndodhen në grevë urie, në ambientet e qendrës shëndetësore, të uzinës së përpunimit të naftës.
Në ditën e 18-të saj, burrat u zëvendësuan nga gratë e tyre, dhe ende nuk kanë hequr dorë nga kërkesat e tyre.
Janë rreth 900 naftëtarë të cilët prej dy vitesh kërkojnë marrjen e pagave të prapambetura dhe kërkojnë rinisjen e punës në uzinë.
