Kryeministri Edi Rama është treguar mjaft i ashpër me mediet, të cilat i ka quajtur kazan. Por, çuditërisht sot ai ka sulmuar Top Channel, televizionin me të cilin historikisht ka pasur një marrëdhënie të mirë.
Por, para pak minutash Rama ka sulmuar publikisht Top Channel, për shkak të një lajmi të publikuar sot lidhur me konferencën për lirinë e medies dhe konferencën për shtyp me komisionarin Hahn.
“Hahn dhe ‘kazani’, cfarë nuk u tha në konferencë?”, është ky shkrimi i publikuar në top-channel.tv, ku shkruhet ndër të tjera se kryeministri e cilësoi median si të pabesueshme.
Rama shkruan se Top Channel gënjeu pasi konferenca për shtyp me Hahn është publikuar në ERTV.
“Nëse një televizion kombëtar që ka bërë histori falë gjenialitetit të të ndjerit Dritan Hoxha, është katandisur sot të gënjejë kaq hapur, edhe për një fakt kaq të thjeshtë, si mund të quhet e besueshme media në Shqipëri?”, përmbyll Rama duke sulmuar publikisht televizionin në fjalë.
Ndërkohë, pyetja që vjen vetiu për çdo medie, është se çfarë e krisi marrëdhënien mes kryeminsitrit Rama dhe Top Channel?
POSTIMI I PLOTË I RAMËS:
“HAHNI DHE KAZANI”
Ky është titulli i lajmit të Top Channel që mund ta shihni bashkëlidhur.
Në lajm, siç do ta lexoni, thuhet se kryeministri e cilësoi median si të pabesueshme.
Po, e vërtetë, kështu mendoj! Por si për ta vërtetuar me dëshminë e vet se sa të pabesueshme janë mediat, Top Channel, siç e shihni, e informon publikun se konferenca për lirinë e medias dhe konferenca për shtyp me Komisionerin nuk u transmetuan në ERTV! Ju të gjithë tani mund ta shikoni vetë provën e kësaj gënjeshtre me bisht, nëse zbrisni në postimin e dytë e të tretë të ditës dhe klikoni videon e dhënë live nga ERTV.
Tani pyetja që vjen vetiu është: Nëse një televizion kombëtar që ka bërë histori falë gjenialitetit të të ndjerit Dritan Hoxha, është katandisur sot të gënjejë kaq hapur, edhe për një fakt kaq të thjeshtë, si mund të quhet e besueshme media në Shqipëri?
