Kryeministri Edi Rama përjashtoi çdo shans për koalicion me ish-kreun e LSI-së Ilir Metën pas zgjedhjeve parlamentare. Ndërsa theksoi se Meta i ka pasur të gjitha postet, dhe ai nuk e kupton se çfarë kërkon më shumë Ilir Meta.
“Nuk ka asnjë shans që të bëjmë koalicion me LSI pas 25 qershorit, të paktën jo Partia Socialiste. Ta marrin vesh njerëzit, se ajo loja i treti, i vërteti duhet të marrë fund. Ilir Meta ka qenë bashkëkryetari i një koalicioni të suksesshëm. Ai është bërë kryeministër, kryetar Kuvendi dhe tani president. Unë nuk e di se çfarë kërkon më shumë Ilir Meta. Se pse Ilir Meta nuk fle i qetë, për mua është mister, ky vend nuk i ka asnjë borxh Ilir Metës”, tha Rama për “Tonight Iliva Tare” në Ora News.
