Ish-kryeministri i PS-së, Bashkim Fino, njëherësh deputeti i Lushnjës ka deklaruar sot se kërkesat e opozitës janë të papranueshme.
Ai ka krahasuar kërkesat e opozitës me futbollin, duke thënë se pakica kërkon që të luajnë futboll, por që PS të mos fusë në lojë Kristiano Ronaldon(Edi Ramën).
Fino tha se zgjedhjet u certifikuan nga OSBE dhe BE, ndërkohë që pas një viti e gjysme opozita po kërkon ribërjen e zgjedhjeve.
“Opozita thotë hajde luajmë në fushë, por mos e fut në lojë lojtarin më të mirë, mos e fut Kristiano Ronaldon. U bënë zgjedhjet në mënyrë më të ndershme. U certifikuan nga OSBE dhe BE dhe tani pas një viti e gjysme na thonë që keni vjedhur zgjedhjet. Por çfarë zgjedhjesh kemi vjedhur ne?
Ne kemi marrë votat e PS-së për të zgjedhur kryeministrin Edi Rama. Ata vijnë në parlament dhe derdhin bojë, derdhin miell, derdhin vezë dhe pastaj ikin. Ne kemi marrë mandatin për 4 vjet, ne do ta vazhdojnë qeverisjen dhe do zbatojmë reformat për 4 vjet”, tha Fino. /Panorama
