Kryeministri Edi Rama ka folur për herë të parë në Kuvend pas dekretimit të tij nga Presidenti i vendit Ilir Meta. Këtë herë, ndryshe nga mandati i kaluar, gjatë prezantimit të programit të tij qeverisës, kryeministri i ka shtruar dorën e bashkëpunimit opozitës, duke i kërkuar që të mendojnë së bashku për të ardhmen e vendit.
Sipas Ramës, konflikti politik dhe sjellja arrogante e politikës, kryesisht brenda mureve të Kuvendit por edhe jashtë saj, ka bërë që shumë njerëz të largohen nga vendi. Ndaj sipas Ramës ka ardhur koha që ata që janë rikthyer të fitojnë besimin e humbur dhe ata që kanë ndërmend të largohen të binden se ky vend mund të bëhet.
“Armiq asnjëherë, ju jeni konkurrentë. Jemi në një garë dhe secili jep alternativën e tij. 25 qershori provoi edhe një herë, se në Shqipëri nuk fiton kush i fryn më shumë zjarrit të konfliktit. Në një nga ditët e protestës së opozitës, kryetari Basha doli me vajzën e tij të vogël. Nuk e sjell këtë rast për ta gjykuar, por gjithçka që ne bëjmë lidhet me fëmijët tanë. Në çdo gjë që bëjmë keq, u bëjmë keq fëmijëve tanë. E ardhmja e tyre është me rëndësi dhe janë përpjekje që përcaktojnë shumëçka për ta. Nevojat dhe pritshmëritë e tyre rriten dora-dorës. Le të mbajmë në radhë të parë atë më kryesoren, në këtë sallë të tregojmë që mos t’u mësojmë tabiatet e vjetra që ndodhin brenda këtyre mureve, ku fjalori jo etik dhe sjellja agresive ndaj njëri-tjetrit shfaqet në sytë e tyre. Ka nga ata që kanë ikur për të kërkuar një jetë më të mirë diku tjetër, por me zemrën e tyre këtu. Por, ka edhe nga ata që rikthehen këtu për të sjellë më të mirën e tyre. Pengesa më e madhe për rikthimin e tyre ashtu si edhe shtysa për t’i larguar nis që këtu në këtë sallë, tek ne”, u shpreh Rama.
