PS do të shkarkojë kryetarët në 61 degët e saj në vend, dhe do të bëjë rizgjedhjen e tyre sipas rregullave të reja. Kërkesa e tyre për ndërprerjen e mandatit të kryetarëve të degëve, arsyetohet nga PS për t’i hapur rrugë implementimit të ndryshimeve në organizimin e strukturës së drejtimit në nivel Bashkie.
Bëhet me dije se procesi i zgjedhjes së strukturave drejtuese do të zhvillohet në periudhën 1 Maj -15 Qershor 2022. Ndryshimet në qeveri duket se po ndodhin edhe për shkak të skandalit të inceneratorëve. Shumë prej autorëve që kanë firmosur aktet për inceneratorët, janë ministra, ish-ministra dhe funksionarët e lartë. Nuk përjashtohet edhe mundësia që kryeministri Edi Rama mund të largojë ministra, por edhe të bëjë zëvendësime.
“Me vendim të kryesisë së Partisë dhe Asamblesë Kombëtare, Kongresi i Partisë vendosi: Të ndërpres mandatin 4 vjeçar të kryetareve aktual të partisë të bashkive. Procesi i zgjedhjes së strukturave drejtuese do të zhvillohet në periudhën 1 Maj -15 Qershor 2022.
Kryetarët aktual të partisë së bashkive do të ushtrojnë detyrën deri në zgjedhjen e kryetarëve të rinj”, thuhet në vendim.
Gjithashtu, degëve të PS do i shtohet edhe posti i Sekretarit Ekzekutiv. Si do zgjidhen kryetarët e rinj të degëve dhe Sekretari Ekzekutiv? Në nenin 26 të statutit të PS përcaktohet mënyra se si do të zgjidhen kryetarët e rinj të degëve, të cilët kanë një mandat 4-vjeçar, ku thuhet se kryetari i partisë së bashkisë përzgjidhet mes kandidatëve të propozuar nga mbledhja e zgjeruar e Asamblesë Socialiste. Po ashtu, theksohet se mandati i kryetarit ndërpritet kur ai jep dorëheqjen dhe kur shkarkohet nga Kryesia e partisë.
“Kryetari i partisë i bashkisë përzgjidhet mes kandidatëve të propozuar nga mbledhja e zgjeruar e Asamblesë Socialiste të bashkisë dhe me miratimin e Kryesisë sipas procedurës së përcaktuar në Librin e rregullave. Mandati i kryetarit të partisë të bashkisë është, si rregull, katër vjet. Ai ndërpritet para kohe kur kryetari i partisë i bashkisë: Jep dorëheqjen, ose kur shkarkohet nga Kryesia e Partisë për dobësi në punë e shkelje të normave të Statutit dhe etikës”, thuhet në nen.
