Kryeministri Edi Rama uroi ish-kancelarin austriak Sebastian Kurz për fitoren në zgjedhjet e parakohshme parlamentare, duke e quajtur një fitore të madhe.
“Urime Sebastian Kurzit për fitoren e madhe dhe jam vërtet i lumtur për Shqipërinë dhe Ballkanin Perëndimor që një kampion i të ardhmes sonë të përbashkët evropiane, do të drejtojë Austrinë mike për vitet e ardhshme kritike që do të vijnë. Të lumtë, kancelar”, thotë Rama.
Zoti Kurz fitoi bindshëm zgjedhjet e së dielës dhe mbështetja për të u rrit me një të pestën e elektoratit krahasuar me zgjedhjet e fundit në 2017.
Rreth 6.4 milionë austriakë kishin të drejtën e votës në zgjedhjet që pasuan rënien e qeverisë së koalicionit të ish-kancelarit me partinë e të djathtës ekstreme, partia e lirisë, FPO, pas një video skandali që detyroi zëvendëskancelarin Heinz Christian Strache të dorëhiqej.
