Ministri i Jashtëm grek, Nikos Kotzias përshëndeti vendimin e qeverisë shqiptare për ndërtimin e varrezave të ushtarëve grekë, të vrarë në malet e Shqipërisë gjatë Luftës së Dytë Botërore.
“Ky është një hap i madh për qetësimin e shpirtrave tanë, si dhe një hap besimi mes dy partive tona që dëshmon se diplomacia mund të arrijë më shumë se sa të bërtiturat pa kuptim”, kështu e komentoi ministri i Jashtëm grek Nikos Kotzias vendimin e qeverisë shqiptare për çështjen e varrezave të grekëve të vrarë.
Këtë deklaratë, Kotzias e bëri teksa iu përgjigj një pyetjeje gjatë një deklarate të përbashkët me homologun e tij afgan, Salahuddin Rabbani, i cili ndodhet për një vizitë në Greqi.
Kotzias tha se “është një hap shumë pozitiv, që tashmë kisha e vogël e Shën Thanasit, e cila u shkatërrua vitin e kaluar në Himarë, po rindërtohet sot me fonde nga qeveria shqiptare”.
“Diplomacia është rruga për të zhvilluar marrëdhëniet tona me fqinjët tanë dhe qeverinë tonë dhe personalisht kam zgjedhur këtë rrugë. Ne marrim barrën e një pajtimi paqësor të diplomacisë dhe zhvillimin e një agjende pozitive në ‘lagjen’ tonë”, shtoi ai. TIRANA TODAY
