Në kuadër të fushatës për llogaridhënien publike përpara qytetarëve, kryeministri Edi Rama tha se qytetarët mund të denoncojnë dhe të kërkojnë zgjidhjen e problemit të tyre përmes platformës së bashkëqeverisjes ‘Shqipëriaqëduam’. Nga Lezha, Rama tha se nëse punonjësit e zyrave të shtetit nuk i përgjigjen si duhet qytetarëve atëherë ata do shkarkohen nga detyra dhe madje mund të shkojnë dhe në ndjekje penale.
“Pra heqim nga zyrat punonjësit që nuk i përgjigjen sipas ligjit dhe detyrës kërkesave të qytetareve. Madje një pjesë e tyre shkojnë edhe për ndjekje penale nëse vërtetohet se neglizhenca e tyre ka qenë e qëllimshme. Kjo është rruga për të zgjidhur sa më shumë halle qe kanë njerëzit dhe për të zgjidhur çështjen e disa punonjësve në zyrat e shtetit që nuk meritojnë rrogën”- tha Rama.
Rama tha ndër të tjera se vetëm dy taksa janë rritur, ndërsa të tjerat janë ulur. Ai tha se taksa e karburantit u rrit, pasi vendi ishte në një situatë të rëndë në vitin 2013 që ishte lënë nga qeveria ‘Berisha’.
“Taksat nuk janë rritur, por janë ulur. Janë rritur vetëm dy taksa, ajo për kompanitë e mëdha dhe për karburantet. Taksën e karburantit e kemi rritur, pasi ne në mandatin e parë ishim në një situatë të rëndë. Saliu kishte lënë një humnerë të madhe borxhesh dhe prandaj thoshte që jemi pranë një skenari grek. Ne rrezikonim që në dhjetor të 2013 të mos kishim mundësi për të paguar pagat dhe pensionet. Ne refuzuam rekomandimin e FMN të ulim pensionet dhe rrogat. Ne preferuam të rrisim taksën e karburantit. Sepse çmimi i karburantit ishte në pikiatë,” tha Rama.
