Kryeministri i Kosovës, Albin Kurti ka vizituar ditën e sotme Tiranën, ku edhe zhvilloi një takim me kryeministrin Rama.
Pas takimit, të dy liderët dolën në një konferencë të përbashkët ku zbardhën çështjet për të cilat ata kishin diskutuar. Gjatë fjalës së tij, Kurti theksoi se dëshiron që në këtë dekadë të tretë të ketë një fillim të fuqishëm të bashkëpunimit Kosovë-Shqipëri.
Kurti tha se është rënë dakord për një komision ndërshtetëror, përbërë nga ministra dhe deputetë. Sipas tij, ky komision do kujdeset që 77 marrëveshjet që janë nënshkruar të zbatohen.
“Vendi i parë që vizitova ishte Prekazi i Adem Jasharit, qyteti i parë ishte Mitrovica, shteti i parë patjetër që duhet të ishte Shqipëria. Të falënderoj për mikpritjen dhe bisedën që kishim, shumë konstruktive. Dua që në këtë dekadën e tretë të kemi një fillim të fuqishëm të bashkëpunimit Kosovë-Shqipëri çfarë nuk ka pasur asnjëherë mes dy vendeve tona, pra ato janë prioritet i njëra tjetrës dhe nuk presin në asnjë fushë.
Duam ta shtojmë bashkëpunimin, duke e thelluar dhe duke e zgjeruar atë. Kosova nuk do ta dilte Serbisë në luftë e as në paqe pa Shqipërinë, ne kurrë nuk e harrojmë këtë dhe duam që të ecim bashkë, shpejt e fuqishëm. Në veçanti duam që të bashkëpunojmë në aspektin ekonomik, të prodhimtarisë arsimit, sigurisë e të politikës së jashtme, fushat në të cilat i kemi preokupimet e njëjta dhe aleatët tanë demokratikë të zhvilluar e perëndimor janë po të njëjtët”, tha ai.
Kurti u pyet në lidhje me çështjen e mini-shengenit ballkanik dhe faktin nëse Kosova do t’i bashkohet ndonjëherë kësaj.
“Ky ishte takimi ynë i parë ka edhe shumë tema që do t’i trajtojmë në të ardhmen e mund të them që e trajtuam shkurtimisht, meqenëse takimi ynë ishte më parë për makroshengenin shqiptar sesa për minishengenin ballkanik”, deklaroi ai.
Ndërkohë, kjo përgjigje u komentua edhe nga Rama, i cili tha: “Kemi një diskutim për të çuar përpara, nuk ka makroshengen shqiptar pa minishengen ballkanik, edhe pse nuk jam i prirur të bëj gjëra mini”.
