Kryeministri Edi Rama ka folur sot rreth masave të marrë për sigurinë ushqimore në Shqipëri.
Gjatë fjalës së tij, Rama u ndal edhe tek shitësit ambulantë, teksa tha se produktet e tyre rrezikojnë shëndetin e qytetarëve, ndërsa shtoi se rivalizojnë edhe kompanitë serioze dhe bizneset e mëdha, siç janë ato të bulmetit, etj.
Sipas shefit të qeverisë, kjo kategori njerëzish, ndonëse mbijeton përmes kësaj forme të shitjes, refuzon të pranojë logjikën e sistemit që kemi zgjedhur dhe pengon kompanitë të fitojnë më shumë.
“Së pari, marrim pjesë në kërcënimin e shëndetit që po i bëhet atyre që e konsumojnë atë produkt dhe së dyti, nuk e shtyjmë atë kategori individësh të mendojë ndryshe, të futet në një sistem tjetër organizimi dhe të fitojë më shumë në fund të ditës. Të dalë nga rrethi i vicioz i mbijetesës, prodho te shtëpia, fut në shishe plastike dhe shit te rruga. Nuk ka shans tjetër që të prodhohet asgjë përveç varfërisë.
Ka edhe një element tjetër po kaq të rëndësishëm. Nuk rriten dot ashtu siç duhet, në mënyrë të shëndetshme, kompanitë serioze, biznesi i vogël, i mesëm dhe i madh në të gjithë këtë sektor nëse nuk garantohet siguria, pasi pasiguria stimulon konkurrencën e paligjshme, të pandershme. Konkurrohen padrejtësisht dhe pengohen që të jenë pjesë e një sistemi rregullash. Kjo nuk i shërben as rritjes së kësaj ekonomie dhe as rritjes së standardeve të sigurisë.
Një mbijetesë njerëzish në një kategori që refuzon të pranojë pas 30 vitesh logjikën e sistemit që kemi zgjedhur, nuk mund të preferohet në emër të keqardhjes, në raport me domosdoshmërinë ku të kemi një sistem që edhe ata që janë në ciklin e mbijetesës prej 30 vitesh (kompanitë), të mund të fitojnë më shumë”, tha Rama.
