Në takimin e radhës me mbështetësit e tij në qytetin e Korçës, kryeministri Edi Rama iu ka dhënë një mesazh të qartë të gjitha forcave të tjera politike se pas zgjedhjeve të 25 qershorit bashkëpunimi i tij me kreun e Partisë Demokratike Lulzim Basha do të jetë permanent.
Rama la të hapur mundësinë e një bashkëqeverisje me Partinë Demokratike kur shpjegoi se tashmë nuk duhet të jenë ndërkombëtarët ata që duhet të bëjnë bashkë liderët politikë.
Ai vuri në dukje se do të ketë një bashkëpunim institucional me PD-në. Ndërsa ata që ankohen sipas tij, janë pjesë e pazareve dhe kërkojnë të bëjnë pazare për pushtet.
“Nuk është çështja kush do t’i fitojë zgjedhjet, se dihet kush do t’i fitojë, por pas votimit të Vettingut ne futemi në një fazë të re. Nuk e kisha menduar ndonjëherë se do të bëja rolin e Romeos dhe të takoja Lulin. Nuk e besoja. Diplomatët e huaj nuk duhet të vijnë këtu dhe të na bëjnë bashkë. Por, do të kemi një dialog institucional dhe një dialog periodik midis kryetarit të qeverisë dhe kryetarit të opozitës. Që të mos na vijë më shkesi dhe të na bëjë bashkë. Këtë njerëzit mezi e kanë pritur. Ndërsa këta që flasin për pazare vetëm aty e kanë mendjen dhe për atë punë kanë bërë televizione dhe dalin në TV”, u shpreh Rama.
