Kryeministri Edi Rama, megjithëse mori timonin, duket se nuk e ka të qartë drejtimin që duhet të marrë. Edhe pse guximtar nga natyra, Rama këtë radhë duket se nuk do të bëjë në kokën e vet, ndaj ka vendosur të marrë sugjerime nga qytetarët. Teksa e konsideron fitoren të njerëzve të zakonshëm dhe përgjegjësinë e barrën mbi vete, ai vlerëson se : “PS-së i duhet një reflektim i thellë brenda vetes, për të kuptuar me sa më shumë vërtetësi, çfarë duhet të korrigjojmë e përmirësojmë tek vetja, tek sjellja e puna e secilit prej nesh dhe e forcës sonë të madhe e të suksesshme, por edhe me jo pak të meta, Partisë Socialiste”.
Megjithëse e ka cilësuar si të suksesshme punën e qeverisë që po shkon drejt mbylljes së mandatit, kreu i saj është i mendimit se ka shumë për të korrigjuar.
“Çfarë duhet të korrigjojmë në përmbajtjen e në stilin e qeverisjes dhe si duhet e mund ta përmirësojmë, kulturën tonë qeverisëse, cilësinë e skuadrës që qeveris, në legjislativ e në ekzekutiv, bilancin qeverisës në çdo sektor. Dhe më e rëndësishmja, si ta bëjmë këtë reflektim sa më gjithëpërfshirës, duke mos folur e dëgjuar vetëm mes njëri-tjetrit, po duke dëgjuar edhe të tjerët, njerëzit e zakonshëm të këtij vendi, sa më shumë prej tyre, qofshin ata që na kanë votuar qofshin ata që nuk na kanë votuar?”, shtron pyetjen ai.
Rama lajmëron se “në këtë fazë tranzitore deri në krijimin e qeverisë së re, të bëhet një proces dëgjimor në të gjithë Shqipërinë, me disa nivele apo rrathë, brenda partisë dhe jashtë saj, ndaj për këtë kërkon sugjerimet dhe mendimet e qytetarëve.
“Ju jam mirënjohës paraprakisht, për çdo sugjerim prej jush këtu në rrjetin tonë dhe për ta bërë ndoshta më të lehtë, komentin tuaj, po ju pyes: Nëse do të ishe ti kryeministri i Shqipërisë, cilat do të ishin tre gjërat më kryesore që do përmirësoje?” , shkruan ai në faqen e tij në FB.
