Kryeministri Edi Rama ka ritheksuar edhe një herë se në truallin e Teatrit Kombëtar nuk do të ngrihen kulla.
I ftuar në emisionin “Real Story”, Rama nuk pranoi t’i përgjigjet pyetjes se çfarë do bëhet me truallin e mbetur bosh, duke përsëritur shumë herë se trualli i Teatrit nuk do të preket.
“Ça të them atë fjalën që thoshte Kadri Roshi? Nuk ka kulla aty, nuk ka more vëlla! Si t’ua shpjegoj? E kam thënë 100 herë? Brenda, jashtë, mbrapa në të gjithë perimetrin nuk ka kulla”, tha ai.
Më tej gjatë diskutimit, kreu i qeverisë pohoi se fillimisht kishte dashur që Teatri Kombëtar të ngrihej përmes një PPP.
“Ne shkuam për ta zgjidhur këtë me PPP, nuk e kam fshehur këtë. Toka para dhe pas teatrit do i jepej mundësi investitorit të ndërtonte për qëllime fitimi dhe për shtetin të ndërtonte teatrin. Kur erdhi oferta, u quajt e papranueshme se për interesin publik, nuk mund të pranohej. Në atë moment nisëm të diskutojmë një sistem tjetër ku bashkia hyn në rolin e zhvilluesit dhe qeveria jep garanci sovrane për Bashkinë e Tiranës”, shtoi ai.
