E tensionuar duket situata në Shkodër, teksa në orën 18:30 pritet të mbërrijë kryeministri Rama. Nga ana tjetër PD ka thirrur mbështetësit e saj në një miting por kjo mund të çojë në një përplasje të rrezikshme të cilën po e ndjejnë edhe gazetarët lokalë.
Është pikërisht reporteri i Shkodrës Senad Nikshiqi ai i cili i bën thirrje komuniteteve fetare të ngrihen në këmbë për të ndalur përplasjen civile.
“Shkodra në komunizëm, Shkodra në ’90, Shkodra në 2 prill, Shkodra u dogj më shumë se kushdo ne ’97 dhe prap Shkodra në 2019? Nëse njëhere të vetme e doni këtë vend ndalni përplasjen civile! Komuniteti musliman, katolik, ortodoks të ngrihen urgjentisht në këmbë në këto pak orë dhe të ndalojnë perplasjen civile! Shkodranët nuk mund të shkojnë në vëllavrasje për hatër të karriges së njërit apo tjetrit”, shkruan Nikshiqi.
Kujtojmë se edhe kryeministri Rama sot nga Kuvendi paralajmëroi se PD, ditën e sotme mund të ketë në plan të bëjë një 2 prill të dytë.
