Kryeministri Rama ka folur sot nga Shishtaveci, ku ka zhvilluar një takim me banorë të zonës.
Ai i dha një rëndësi të madhe edhe ndërtimit të aeroportit të ri të Kukësit, një premtim i dhënë prej kohësh ky nga qeveria Rama.
Kryeministri premtoi se në fillim të vitit të ardhshëm do të nisë puna për ndërtimin e Aeroportit të Kukësit.
“Në fillim të vitit të ardhshëm do të nisë ndërtimi i aeroportit, ekzistuesi do të transformohet në një aeroport të standardeve ndërkombëtare për fluturimet me çmime të ulëta dhe studimi që ne kemi bërë me ekspertë të huaj na ka inkurajuar shumë dhe mua më ka entuziazmuar se gjithë analizat e bëra sipas metodave profesionale të parashikimit për suksesin e një biznesi tregojnë se Kukësi do të lëvizë në një mesatare prej 300 mijë udhëtarësh në vit”, tha Rama. Ai shtoi se kjo do të sjellë një rritje të madhe të konsumit dhe të investimeve.
“Imagjinojeni vetë se ç’do të thotë që 300 mijë njerëz që lëvizin përmes Kukësit për të fluturuar jashtë apo për të ardhur nga jashtë këtu. Safeti duke qeshur me tha ‘300 mijë kafe më shumë në Kukës’ për të thënë që aeroporti sjell rritje konsumi, investimesh”, përfundoi Rama.
