Kryeministri Edi Rama është në një takim të organizuar me qytetarët për të prezantuar rastet të cilat nëpërmjet platformës, u janë zgjidhur problemet. Sipas Ramës, platforma “Bashkëqeverisja me qytetarët” ka mundur të lehtësojë lodhjen e shkaktuar prej vitesh qytetarëve shqiptarë.
“Sot nuk kemi më Hipotekë dhe Aluizni të ndarë, por një agjenci e cila sapo ka filluar bashkimin në një. Mos prisni, mos lejoni t’u shikojnë nga xhepi, mos kërkoni deputetin e krushkun, por thjesht një klik në Shqipëriaqëduam.al dhe menjëherë keni qeverinë në krahun tuaj. Qeveria është një instrument në dorën e çdo qytetari”, theksoi Rama.
“Ishim angazhuar për një reformë shumë të vështirë dhe sot kemi arritur të kemi një agjenci te vetme. Pas 20 e kusur vitesh i kemi dhënë fund një ecejaku që ka marrë kohë të madhe nga qytetarët. Një nga plagët më të rënda që kemi trashëguar, bëhet fjalë për harta që fizikisht janë copë-copë. Më në fund ja kemi dalë, sot kemi një agjenci të vetme. Tani qytetari kur shkon për të marrë një legalizim, merr certifikatën. Nuk ka me dy stacione. Merr fund kostoja që kanë shpenzuar prej vitesh”, tha ndër të tjera kryeministri.
