Në një takim të mbajtur me studentët e Mjekësisë në ditën e parë të këtij viti akademik, kryeministri Rama premtoi se shumë shpejt do të ndërtohet edhe spitali i ri i Kirurgjisë. Duke bërë një pasqyrim të situatës si ka qenë universiteti dhe si është bërë tani, Rama tha se duhet një përpjekje për ta bërë atë më të mirë.
“Nuk bëhet fjalë thjesht për të marrë një profesion, por më shumë se kaq. Dhe si thoshte edhe Hipokrati; të dashurosh artin e mjekësisë, do të thotë të dashurosh njerëzimin.
Ju e dini se nga mjeku kërkohet të bëjë mrekullira, dhe kur mrekullirat nuk janë të mundshme, kjo i kthehet mjekut, ku duhet të përballet edhe stresi. Sot mund të themi se universiteti është në një gjendje më të mirë se çfarë ishte dje, duhet një përpjekje më të madje për ta bërë atë më të mirë. Studentët që nisin sot shkollën, i kanë më të mira kushtet se ata që e mbyllën këtë vit.
Ne kemi bërë gjithçka që QSUT të përmbyllë procesin që ka nisur. Nëse e shohim sot, atje ka zona gri dhe boshllëqe të konsiderueshme, por besoj se kushdo që njeh QSUT, shikon ndryshimin si ka qenë dhe si është bërë.
Do të ndërtohet shumë shpejt edhe spitali i Kirurgjisë, i cili do tu vijë të gjithëve në ndihmë. Unë do të bëj një urim të gjithëve atyre që fillojnë shkollën, por atyre që e vijojnë atë. Ne do të bëjmë më të mirë që të kemi një proces sa më cilësor. Ne tani kemi hapur një rrugë të re për të gjithë ata që janë më të mirët. Ju uroj shumë shëndet edhe juve dhe në familjen tuaj”, u shpreh Rama.
