“A ka shqetësim të marrëdhënies tuaj me Erdoganin në Bruksel?” ishte pyetja e drejtpërdrejtë që gazetarja Ilva Tari i bëri sonte kryeministrit Edi Rama. Kësaj pyetjeje kryeministri iu përgjigj i bindur se marrëdhëniet me Turqinë nuk përbëjnë asnjë kërcënim.
I ftuar sonte në “Tonight” në Ora News, Rama deklaroi se shpreson dhe punon të ketë shumë më tepër investime turke sesa ka aktualisht në Shqipëri. Gjithashtu, kryeministri deklaroi se i vinte për të vjedhë kur dëgjonte profesorët e kazanit që flasin për shantazhim të Evropës.
“Marrëdhënia e Shqipërisë me BE matet me qëndrimet që kanë qenë 100% të linjëzuara me vendet e BE. Shpresoj dhe punoj të ketë shumë më tepër investime turke sesa ka.
Marrëdhëniet me Turqinë nuk përbëjnë asnjë kërcënim. Profesori duhet ta mbajë mend që Turqia ka qenë i pari vend që ka njohur Kosovën e pavarur
Nëse të krishterët katolikë e ortodoksët morën katedralet e tyre, myslimanët meritonin të kishin tempullin e tyre të barazvlefshëm, as më të madh dhe as më të vogël, dhe besoj se është bërë gjëja e duhur.
Sa i takon financimit profesori duhet ta dijë që është financim i dhënë nga komuniteti mysliman turk për komunitetin mysliman shqiptar. Dhe ky i fundit nuk varet nga qeveria, mjafton që financimi të mos jetë me prejardhje terroriste.
Me keqardhje mund të them që këto janë broçkulla. Më vjen për të vjedhë kur dëgjoj këta profesorët këtu të kazanit që flasin për shantazhim të Evropës,” deklaroi Rama.
