Në fjalën e mbajtur në seancën e Parlamentit, kryeministri Edi Rama ka kritikuar edhe mediat e huaja. Duke përsëritur termat ‘kazan’ e ‘kadrinj’ , kreu i qeverisë u shpreh se në të gjitha klubet mediatike ekspozohet në vazhdimësi çdo ngjarje që nuk përbën ngjarje.
Mirëpo, kjo deklaratë e kryeministrit se “Euro-kadrinjtë nuk e dinë se ç’ndodh në Shqipëri”, ka ngjallur reagimin e analistit Artur Zheji.
Sipas tij, sjellja e Ramës ndaj mediave vjen si pasojë e gjendjes së rënduar të tij, ndërsa shton se pasqyrimet e tyre mediatike nuk e bëjnë vendin pis.
“Ky ishte një sinkron i sotshëm i Kryeministrit i cili bëri prapë një shpikje të re. Nuk dua t’ja nënvizojmë se ai merr zjarr dhe bën të tjera shpikje. Sot dëgjuam për herë të parë eurokadrinj. Kadrinjtë janë gazetarët që nuk i pëlqejnë Kryeministrit, si duket e urren emrin Kadri. Pasi më parë tha se këta janë dhe derra që rrinë nëpër studio shtrirë. Është një situatë shumë e rëndë, ai është rëndë. Kjo quhet eksitim verbal për të futur palët në përplasje. Por deri te eurokadrinjtë nuk kishim shkuar. Tani kadriizmi gazetaresk ka kaluar kufijtë e Shqipërisë. E bukura është se thotë ju po baltosni Shqipërinë, po e bëni pis”, tha Zheji.
