Kryeministri Edi Rama, gjatë prezantimit të programit qeverisës, i ka dhënë merita edhe opozitës në luftën ndaj kanabisit. “Votat nuk merren duke mbushur veshët e të huajve me baltë ndaj njëri-tjetrit, zgjedhjet s’fitohen duke financuar të huajt të deklarojnë e publikojnë sensacione të zymta për këtë vend që është njësoj për të gjithë ne, pushteti s’merret duke shkuar në Bruksel të ndarë. Mos ta mendojë askush se po i bie vërdallë duke pasur parasysh dekriminalzimin apo kanabisin, problematika reale padyshim por sipas meje u frynë duke kaluar çdo cak e masë në sytë e veshët e botës. Duhet te thuhet sot se opozita luajti një rol real ne shkundjen tone karshi këtyre problematikave. Nëse sot ne jemi në një ofensivë totale dhe me rezultate të paimagjinueshme kundër kanabisit e kotë të mohohet se edhe opozita pati kontributin e saj”, u shpreh Rama.
Dialogu dhe bashkëpunimi
“Le të mos e debatojmë le ta marrim të mirëqenë si e mendoni ju, por le të provojmë që problemet t’i diskutojmë së bashku, ti zgjidhim një herë me durim e mirëbesim si përpiqemi të ndajmë raportime fakteve nga e vërteta. Sot po flitet paturpësisht për krim etnik shqiptar, ndaj kësaj besoj se s’ka asnjë diskutim që ne duhet të jemi bashkë, shteti ynë kushtetuta e tij, procesi zgjedhor në Shqipëri, paraja a zezë në politike, media janë gjëra të madha që parimisht nuk na ndajnë, por na bashkojnë. Çfarë na pengon të hapim një dialog serioz?”
