Rama jep lajmin e mirë: Mbërrijnë 11.700 doza të tjera vaksinash nga Pfizer

Mbrëmjen e sotme kanë mbërritur në Shqipëri 11.700 doza të tjera të vaksinës anti-COVID të kompanisë Pfizer.

Lajmin e ka bërë me dije kryeministri Rama, i cili thotë se 7020 doza janë nga kontrata e Shqipërisë me Pfizer dhe 4680doza nga mbështetja e Bashkimit Europian.

”11,700 doza të tjera të vaksinës Pfizer sapo kanë mbërritur në Shqipëri – pjesë e kontratës së qeverisë me kompaninë Pfizer 7020 dhe një sasi e parë 4680 nga mbështetja e Bashkimit Europian’’, shkruan Rama në rrjetin social, Facebook.

Ndërkohë, më herët Ministrja e Shëndetësisë dhe Mbrojtjes Sociale, Ogerta Manastirliu ka publikuar shifrat ditore të të vaksinuarve kundër koronavirusit në vend.

Me anë të një postimi në rrjetin social Twitter, ajo shkruan se sot janë kryer 19,886 vaksinime.

Nga fillimi i fushatës “Shqipëria buzëqesh” janë vaksinuar në total 537,837 qytetarë. Sipas ministres, fushata e vaksinimit po ecën me hapa të shpejta dhe të sigurta.