Kryeministri Edi Rama, tha se gjatë kësaj jave vaksinimi anti-covid do të shtrihet edhe në dy qytete të tjera, përkatësisht në Vlorë dhe Shkodër.
Në një konferencë nga aeroporti i Rinasit, ku pritet ardhja e 7.020 vaksinave nga Pfizer, Rama u shpreh se këtë javë përveç bluzave të bardha, do të nisë vaksinimi edhe te më të moshuarit.
Sipas Ramës, mund të arrihet objektivi që vaksinimi i popullsisë të realizohet në 14 muaj.
Edi Rama: ”Jemi duke pritur që sipas kontratës kompania Pfizer të na lejojë që të zbatojmë edhe marrëveshjen me atë shtetin tjetër, që solli dozat e para. Në kontratën që Pfizer bën me vendet e tjera, për çdo lëvizje të kësaj natyre duhet aprovimi i Pfizer dhe ne nuk mund të aktivizojmë këtë sasi pa aprovimin e Pfizer. Me ardhjen e këtyre dozave sot dhe me pasjen e një qartësie për ato 40 mijë doza që janë konfirmuar, ne do fillojmë shtrirjen e vaksinimit gjatë kësaj jave në Vlorë dhe në Shkodër, dhe po ashtu hap pas hapi, në varësi nga kalendari i ministres, edhe në Elbasan, Fier.
Paralelisht me vaksinimin e mjekëve dhe bluzave të bardha, do të bëjmë edhe fillimin e vaksinimit të më të moshuarve. Kemi të gjitha arsyet të jemi të bindur se ne mund ta realizojmë objektivin e vaksinimit të plotë për 14 muaj. Është vetëm çështje konfirmimi të sasive dhe disponimi të sasive.
