Në një aktivitet të zhvilluar në Universitetin Bujqësor të Tiranës, kryeministri Edi Rama ka shkëmbyer batutat e radhës, por nuk ka kursyer edhe ironitë therëse. Teksa nuk i kurseu kritikat për sistemin e shkuar, përpara të pranishmëve tha se me gjasë ai duhet të ishte i vetmi pa asnjë titull shkencor në mesin e tyre. Kreu i qeverisë tha se në sallë ai mund të jetë i vetmi pa tituj akademikë, ndërsa shqiptarët janë me Master. Ndër të tjera shtoi se ndonëse nuk i pëlqejnë komplimentet, do i pranonte nga një njeri që kurrë nuk e kishte votuar.
Universiteti Bujqësor i Tiranës, UBT, nis bashkëpunimin me universitet më të njohura në Evropë, nga i cili do të përfitojnë 30 studentë ekselentë dhe profesionistë të rinj në bujqësi.
“Sot për mua është një ditë e shënuar e marrëdhënies me rektorin, për shkak se në të drejtën e tij ai ishte shumë i shqetësuar disa kohë më parë. Qoftë për faktin se ka pasur një rënie për regjistrime në Universitetin Bujqësor, qoftë për faktin e mos hapjes së doktoratave. Për të dyja kemi pasur diskutime, se si t’ia dalim më mirë.
Besoj qe në këtë sallë unë duhet të jem i vetmi pa asnjë titull shkencor, dhe pa asnjë status akademik. Një Bachelor i thjeshtë jam unë nga e kaluara ime. Megjithëse Evisi thotë se po të konvertohet me të sotmen, i bie të jetë Master. Por kjo fjala Master më është bërë tmerr, une mendoj se të gjithë shqiptarët janë me Master”, u shpreh kryeministri.
Nga ana tjetër Rama bëri batuta edhe me rektorin e këtij universiteti, Fatbardh Sallaku i cili e falenderoi për vëmendjen që po i jep këtij universiteti. Kreu i qeverisë me nota humori u shpreh se komplimentet nuk i ka qejf, por nga një person që nuk e ka votuar ndonjëherë do ti pranojë.
“Është e vërtetë që unë nuk i kam qejf komplimentet, por nga dikush që nuk më ka dhënë asnjëherë votën, unë i pranoj. Më vjen shumë mirë që rektorin dhe me stafin drejtues të këtij universiteti kemi një bashkëpunim të ngushtë, një bashkëpunim shumë intensiv dhe ma ha mendja me dobi të madhe e cila duket hap pas hapi. Natyrisht në favor të universitetit, por edhe në mbështetje të një sektori jetik, i cili është në një fazë delikate të jetës së vet për shkak të domosdoshmërisë për sa më shumë dije dhe inovacion dhe të përplasjes së vazhdueshme me mendësinë e të shkuarës. Si dhe me inercinë që vijon të jetë një forcë në të kundërt të sensit të natyrshëm të bashkimit dhe të bashkëpunimit për të nxjerrë më të mirën”.
