Kryeministri Edi Rama e ka quajtur Shqipërinë një shtet të ngjashëm me Italinë e para disa viteve.
Gjatë fjalës së tij në forumin e biznesit, Rama tha se Shqipëria ka potenciale dhe mundësi të mëdha investimi, ndërsa theksoi këtë avantazhin e taksave të ulëta.
Po ashtu, kryeministri u përmendi investitorëve faktin se kushdo që investon në hotele me 5 yje, është i përjashtuar nga taksat, duke e konsideruar si një mundësi perfekte për investitorët, shkruan Tirana Today.
Në mbyllje të fjalës së tij, Rama tha se Shqipëria është një Itali e vogël, që synon të bëhet si shteti fqinj, gjë që do ishte maksimumi për ne, tha ai.
Fjala e plotë e Ramës:
Jemi Italia e gjyshërve tuaj, ku ka shumë për të bërë dhe për të fituar. Ata që e kanë bërë këtë hap, mund të dëshmojnë që përveç problemeve, pengesave, Shqipëria vërtet i garanton të gjitha këto.
Ka një mënyrë të qeni e të jetuari që ngjajnë si dy pika uji me mënyrën tuaj në Itali, me avantazhin që taksat janë shumë më të ulëta dhe burokraci. Janë dy gjëra që e bëjnë të vuajë Italinë për shumë vite, kurse në Shqipëri nuk janë shumë të rënda. Po të vazhdoja të flisja për taksat, nuk do më mbështeste ministri.
Vendi ka shumë potenciale rritjeje dhe mundësi investimesh, në bujqësi, në mënyrë të veçantë në sektorin agro-ushqimor. Sipas nesh, hapësira ku mundësitë janë të shoqëruara edhe nga një kërkesë e fortë, është ajo e turizmit. Pra, ka vërtet shumë për të bërë në këtë fushë. Po shikojmë me shumë vëmendje dhe kureshtje të dhënat e rritjes të sistemit turistik të Italisë. Kemi përgatitur një legjislacion shumë tërheqës për investimet. Mjafton të kujtojmë se kush investon në hotele me 5 yje, do kishte 10 vjet pa asnjë taksë, as për ndërtimin, vetëm TVSH-në prej 6%, vetëm kaq. Po të donin, do të kishin edhe licencën falas për kazinotë edhe për marinën.
Po mendojmë të asgjësojmë shumë pengesa burokratike, administrative, duke reduktuar kohën e nevojshme për një ndërmarrje që të fillojë një aktivitet të vetin këtu. Dokumentet që vijnë nga zyra e shtetit, shteti duhet t’i garantojë vetë ato. Është zyra që duhet t’i japë ato autorizime për llogari të shtetasit apo sipërmarrjes.
U tha që kemi futur edhe figurën e ministrit ët Shtetit, që do të thotë se për çdo rast shqetësimi, do bëhet një çështje për të cilën do kujdeset vet qeveria.
Më duket se jemi në gjendje të mirë për t’ju thënë që është një vend për çdo sipërmarrës italian për të fituar. Edhe Reforma në Drejtësi është një element i rëndësishëm.
Duam të jemi anëtarë të BE-së, por për mua do ishte objektiv i arritur nqs do ishim pjesë e jugut të Italisë. Ne s’mund të bëhem Zvicër dhe as gjermanë, se do ishte tepër e mërzitshme kjo, por ta bëjmë Shqipërinë një Itali të vogël, do ishte maksimumi për ne. TIRANA TODAY
