Kryeministri Edi Rama iu përgjigj të mërkurën deklaratave të kryetarit të PD-së Lulzim Basha që i kërkonte të zbatojë platformën e opozitës së bashkuar për daljen nga kriza ose të hapte krahun.
“Unë mendoj që nuk është e rëndësishme të harxhojmë kohën e njëri-tjetrit dhe të njerëzve me këtë procesin ai tha po ti si thua, pastaj do shkoni te ai do i thoni, ai tha ashtu. Më mirë merremi me njerëzit, me problemet reale. Tërmetet artificiale unë kam në dorë t’i krijoj, por jo t’i parandaloj. Tërmetet natyrale largqoftë askush nga ne si ndalon dot, ajo që kemi në dorë është të bëjmë çfarë kemi në dorë. Kështu që është njësoj si një karrocë me kalë t’i thotë një treni hap krahun”, tha Rama.
Kryetari i Partisë Demokratike i kërkoi kryeministrit dhe përfaqësuesve të tij të zbatojë propozimet e opozitës joparlamentare ose në të kundërt “të hapë krahun”.
“Jemi të gatshëm ta zbatojmë ne”, tha Basha.
