Ish-deputeti Partisë Demokratike, Agron Shehaj hedh akuza ndaj kryeministrit Rama, pasi sipas tij nuk ndalon së vjedhur.
Me një status në “Facebook”, Shehaj shkruan se dy koncesionet e fundit për segmentet rrugore Oikum-Dukat dhe Milot-Balldre, do t’u kushtojnë shqiptarëve miliona, ndërsa vetë Rama, thotë ish-deputeti, do të fusë në xhep 200 mln euro.
Ndër të tjera, Shehaj i bën thirrjen të gjithë qytetarëve që t’i bashkohen sot protestës kombëtare të opozitës.
“Ndërkohë që vëmendja e opinionit publik është te kriza politike, Edi Rama nuk ndalon së vjedhuri shqiptarët. Dy koncesionet e fundit që sapo ka miratuar në rrugë janë zhvatje gjigante prej pothuajse 200 mln eurosh. Rruga Orikum-Dukat, 16 kilometra, do të rindërtohet, po me një korsi të vetme, dhe do të kushtojë afërsisht 70 milionë euro. Kostoja e vërtetë nuk shkon mbi 1 mln euro për kilometër, afersisht mbi 50 mln do të vidhen. Rruga Milot-Balldre, 17 kilometra, do të ketë një kosto skandaloze prej 256 milion eurosh.
Sikurse e ka shpjeguar mjaft qartë gazetari Klodian Tomorri, 146 milionë euro nga to do të vidhen, dhe nuk ka pikë dyshimi se në xhepat e kujt do të shkojë shumica e tyre. Qeveria e Edi Ramës është masakër mbi arkën dhe pasuritë publike. Çdo ditë që Edi Rama qendron në pushtet, Shqipërisë i grabiten miliona euro. I ftoj të gjithë qytetarët të na bashkohen në protestën tonë sot për të ndalur plaçkitjen kombëtare të Edi Ramës”, shkruan Shehaj.
