Dje ishte një ditë e ngjeshur për Parlamentin, e jashtë saj dukej si një arenë lufte. Opozita përdori të gjitha alternativat e mundshme duke shkaktuar trazira, e nga ana tjetër Kuvendi vijonte regullimisht punimet.
Shtatë deputetë të maxhorancës nuk kanë qenë të pranishëm në seancën e djeshme parlamentare.
Krahas kryeministrit Rama, dje në seancë mungonin edhe deputetët Mimi Kodheli, Gjetan Gjetani, Reme Lala, Fidel Ylli, Xhevit Bushi dhe Ilir Xhakolli.
Përveç kryeministrit, i cili ishte në një aktivitet tjetër në qytetin e Lushnjës, nuk dihet arsyeja e mungesës së deputetëve të tjerë të maxhorancës.
Pavarësisht këtyre mungesave, maxhoranca i kishte sërish votat e nevojshme për të miratuar projektligjet që kishte në rendin e ditës, ashtu edhe dy projektvendimet që konsistonin në miratimin e strukturës së funksionimit të Këshillit të Lartë të Prokurorisë dhe Këshillit të Lartë Gjyqësor.
