Gjatë prezantimit të Drejtorit të ri të Përgjithshëm të Policisë së Shtetit, Muhamet Rrumbullaku, kreu i qeverisë Rama kërkoi dënimin më të rëndë për autorin. Vdekja e 7-vjeçares në Potam të Himarës e cila u godit nga skafi i drejtuar nga polici Arjan Tase, është konsideruar nga kryeministri Edi Rama si një tragjedi, që rëndohet akoma më shumë edhe nga profili i autorit. Rama tha se për atë ngjarje nuk ka ngushëllim, ndërsa shprehu vlerësimin maksimal ndaj familjes që në kulmin e një dhimbje ekstreme tregoi vetëpërmbajtje, duke mos kërkuar politizimin e fatkeqësisë.
“Nga goditja fatale e një skafi në bregun e detit dhe sot kur vala e madhe e reagimeve mbi plagën e sapohapur është fashitur, por meqenëse jemi pikërisht këtu në Ministrinë e Brendshme, në një moment ndryshimi në Policinë e Shtetit kam dëshirë të ndaj një reflektim me publikun dhe me ju që jeni gjithë skuadra drejtuese e ministrisë dhe policisë. Dhimbja për një jetë aq të re të rrëmbyer aq egërsisht nga një shkelje aq e papërgjegjshme e rregullave, sinqerisht më ka gërryer me ditë dhe me net. Edhe kur i shkruaja dhe tani që i lexoj këto rreshta prapë kam një ndjenjë shumë të madhe revolte, për shkakun se shkelësi, i cili u kthye në vrasës nuk ishte një pushues i zakonshëm por një punonjës policie. Edhe si pushues duhet të jetë shembulli respektit për ligjin dhe për rregullin.
Ky fakt e bëri tragjedinë për çdo shqiptar jo thjesht të dhimbshme, siç do të ishte pavarësisht se kush do ishte autori, por edhe shumë revoltuese për shkak të profilit të autorit. Dhe ajo tragjedia nuk kishte dot dje dhe s’ka dot sot asnjë ngushëllim, se s’ka si të ketë ngushëllim për familjen e një fëmijë viktimë, ama është vendi të thuhet besoj se dhe në kulmin e një dhimbje ekstreme ajo familje e thjeshtë tregoi vetëpërmbajtje të llahtarshme, duke mos kërkuar politizimin e fatkeqësisë. Respekt pafund për ta që edhe në kulmin e përballjes me të pangushëllueshmen qëndruan jashtëzakonisht lartë, por ishte një neveri e gjallë sesi të pangushëllueshmit u shfaqën në media, si të thonin që vogëlushja iku nga kjo jetë për të furnizuar me gjakun e saj engjëllor makinerinë e urrejtjes. Madje jo vetëm nuk dua të merrem me ta, por arsyeja se pse i sjell këtu është që dua ta them publikisht me keqardhje që bëra gabim që reagova menjëherë pas ngjarjes, duke krijuar mendimin se e kisha me të gjitha ata që ishin të revoltuar siç isha dhe unë vetë. Të gjithë ata duhet ta dinë që jo vetëm i kam mirëkuptuar, por i kam mbështetur ata djem e vajza që u organizuan vetë për të dalë në një protestë qytetare këtu përballë Ministrisë së Brendshme. Natyrisht nuk isha dakord me mendimin e tyre se vogëlushen e vrau shteti. Por ndaj të njëjtin mendim me ta për disa nga psetë e asaj ngjarje”.
Kryeministri Edi Rama ka njoftuar krijimin e një Njësie të re Policore me emrin “Jonada”, sikurse emri i vogëlushes që u vra me skaf në Himarë nga ish-polici Arjan Tase.
Rama tha se kjo njësi do monitorojë plazhet nga viti i ardhshëm, dhe do imponojë respektimin e rregullave të lëvizjes ujore.
“I kam kërkuar ministrit të krijojmë një Njësi Speciale Policore që do e quajmë “Jonada”, dhe vitin e ardhshëm të jetë aktive në monitorimin e plazheve nga uji dhe ajri dhe me dron për të garantuar sigurinë e plotë të pushuesve. Pa ju rënë në qafë për inerci të gjithë atyre që vizitojnë Shqipërinë përmes ujërave territorialë dhe nuk kanë arsye të shohin polic me sy përsa kohë nuk kërcënojnë asgjë”, tha Rama.
