Kryeministri Edi Rama ka dhënë një intervistë për median italiane “Panorama”, ku ka folur edhe për çështjen e negociatave me BE-në dhe problemeve të ndryshme të brendshme.
Një nga pyetjet e drejtuara nga gazetari Italian ka qenë për këndvështrimin e Kryeministrit Rama mbi ngjarjet e Astirit.
Pyetjes së tij, se a janë pika e dobët protestat në rrugë, Rama i është përgjigjur: “Ne jemi një demokraci e re, por vuajmë edhe nga një kulturë e vjetër politike. Dobësia jonë konsiston në të kaluarën tonë të mbrapshtë, që vazhdon ende të frenojë zhvillimin në pothuaj çdo sektor. Për këtë arsye, modernizimi i shtetit për mua është një përparësi absolute”.
Gjithashtu, KM ka deklaruar se ka qenë shumë i zhgënjyer nga vendimi i BE-së, për refuzimin e negociatave. Teksa ka folur për vendimin e Francës, kryeministri ka theksuar se nuk është asnjëherë, as e bukur dhe as e thjeshtë të jetosh me ndjesinë e plotë se je tallur.
