Rama ka sqaruar akuzat e shumta të ardhura nga ana e opozitës, se qeveria e tij është e lidhur me oligarkët. Rama tha se biznesmenët që opinioni publik i akuzon si oligarkë, janë taksapaguesit më të mëdhenj në vend.
Kryeministri tha më tej se është krijuar ideja se ata kanë thesin të mbushur me lekë, dhe arratisen. Por ai konfirmoi krejt të kundërtën. Duke qëndruar në të njëjtën linjë, Rama deklaroi se nuk ka thes me para, por një marrëveshje që sipërmarrësi të paguajë një investim dhe të bëjë një shërbim. Dhe shteti në një periudhë kohore, t’ia shlyejë investimin dhe në fund të marrë produktin.
“Çfarë influence kanë oligarkët mbi ne? Si shpjegohet që këta konsiderohen pushteti real në Shqipëri, janë njerëzit më të taksuar dhe shërbejnë më shumë sesa më përpara.
Shihni sa kanë paguar në 8 vite (tregon grafikun). Këto para kanë shkuar në arkën e shtetit. Meqë këtu të gjithë merren me emra, të na thonë një emër nga këta top 10, apo top 100 që nuk kanë qenë pjesë e taksimit.
Ja çfarë raporti kanë sot me shtetin, dhe ja çfarë raporti kishin deri dje me shtetin. Aq shumë flitet, sa janë infektuar edhe disa nga ne. Përsëritja e përditshme e të njëjtës gënjeshtër ka gjasë të duket si e vërtetë. PPP janë skema për të ndihmuar qytetarin, kush përfiton nga PPP për check-upin? Afro gjysmë milioni arrijnë këtë vit.
Ka gjë më të rëndësishme sesa shqiptarët të mësohen të kontrollohen në mënyrë të rregullt? Se duket sikur ka një thes të mbushur me lekë, që i jepet oligarkut tek dera, dhe ai ikën me thes. S’ka thes, ka një marrëveshje që sipërmarrësi të paguajë një investim, dhe të bëjë një shërbim dhe shteti në një periudhë kohore X, t’ja shlyejë investimin. Dhe në fund të marrë produktin. I gjithë laboratorët dhe infrastruktura bëhet pronë e shtetit”, është shprehur Rama.
