Kryetarja e Bashkisë së Shkodrës, Voltana Ademi, është prononcuar në lidhje me vrasjet e dy vëllezërve Bilali. Ademi thotë se situata duhet të tmerrojë kryeministrin, ndërsa shton se Shkodra është nën mëshirën e larjes së hesapeve.
“Shkodra vazhdon të lihet në mëshirën e larjes së hesapeve, dhe të krimit. Situata duhet të tmerrojë kryeministrin dhe gjithë qeverinë”, ka thënë ajo, duke e cilësuar tejet shqetësuese situatën në këtë qytet. “Shteti duhet të marrë përgjegjësinë, qytetarët janë të tmerruar”.
Shkodra u trondit gjatë paradites nga një atentat mafioz, ku mbetën të vdekur dy vëllezërit Astrit e Brahim Bilali. Dy vëllezërit u qëlluan me breshëri automatiku në afërsi të banesës së tyre, në lagjen ‘Kiras’ të Shkodrës.
Pas ngjarjes, autorët janë larguar me një automjet, i cili është gjetur duke u djegur në një rrugicë në brendësi të lagjes ku ka ndodhur ngjarja. Astrit Bilali është babai i Asmer Bilalit, ish-kampionit të boksit, i arrestuar nga policia si pjesë e grupit Bajri.
