Ditën e sotme kryeministri Edi Rama dhe Ministrja e Shtetit për Marrëdhëniet me Parlamentin Elisa Spiropali, kanë zhvilluar një takim me raportuesen e Shqipërisë në PE Isabel Santos.
Spiropali ka publikuar në rrjetin social Facebook disa foto të shkrepura gjatë takimit, ndërkohë krah tyre shkruan: “Takim tejet konstruktiv mes eurodeputetes Isabel Santos, raportueses për Shqipërinë në Parlamentin Evropian dhe kryeministrit Rama.
Shprehëm falenderimet tona më të ngrohta për solidaritetin, besimin dhe mbështetjen financiare të jashtëzakonshme nga komuniteti evropian në Konferencën e Donatorëve.
Diskutuam mbi rezultatet konkrete që kemi arritur në përmbushjen e prioriteteve kyçe: Reforma në Drejtësi, lufta kundër krimit të organizuar dhe korrupsionit, nismat e fundit ligjore si antiKÇK, e duke vijuar me rëndësinë e dialogut mbi reformën zgjedhore si dhe përgjegjësinë e lartë që ka qeveria për të qëndruar në lartësinë e sfidës së procesit të integrimit”.
