Kryeministri Edi Rama, në Mallakastër, u bëri thirrje demokratëve dhe atyre që votojnë Partinë Demokratike që Sali Berishën ta mbajnë në zemër, madje dhe fotografinë e tij po të duan ta varin te dhoma e pritjes. Rama shtoi se dhe fotografinë e Lulit ta varin te dhoma e gjumit po të duan por votën ta hedhin për Partinë Socialiste.
“Saliun mbajeni në zemër, fotografinë po të doni varuani te dhoma e pritjes. Fotografinë e Lulit vareni tek dhoma e gjumit po të doni, por votoni Partinë Socialiste”, tha Rama.
Gjithashtu, kryeministri Rama shtoi se “Në 44 muaj të përpjekjeve të mëdha nuk kemi bërë aq sa duhet sepse çka kemi trashëguar në çerek shekulli pa shtet nuk mund të rindërtohet në një kohë kaq të shkurtër. Por kemi bërë mjaftueshëm që ky vend mund të bëhet dhe se vetëm PS mund të bëjë shtet për të gjithë shqiptarët. 25 qershori është një udhëkryq ku flamurin e Ismail Qemalit do ta ngremë më fort në oborrin e Bashkimit Evropian. Ne kemi bërë shumë reforma. Koalicioni ynë ka bërë shumë reforma. Ju kërkojmë një votë që do të garantojë përgjegjësi të plotë për partinë socialiste. Nuk duam që të kemi timonin me njerëz të tjerë në prehër. Sistemi i ka kthyer zyrat e shërbimeve ndaj njerëzve në degë ku partitë i kanë kthyer për fitimet e tyre. Kësaj keqe të madhe duhet që t’i japim fund më 25 qershor. Të rrisim ekonominë mbi 5 për qind. Duam portën e hapur të drejtësisë dhe portën e shërbimeve të shtetit për qytetarin. Portën e drejtësisë kemi filluar ta hapim me vizion me kurajë dhe kokëfortësi. Për katër vitet e ardhshme ajo portë do të jetë e hapur. Ne do të rrisim ekonominë dhe punësimin për katër vitet e ardhshme”, tha Rama.
Rama u tha rrogëtarëve shtetëror që pas orarit zyrtar të mos flenë gjumë por të bëjnë fushatë për Partinë Socialiste.
