Gazetari Mustafa Nano ka komentuar në lidhje me një foto të realizuar së fundmi të Ramës me presidentin Trump. Një fotografi e cila u komentua gjerësisht në media, e bëri goxha zhurmë.
Në monologun e tij në emisionin “Provokacija”, analisti shton se kryeministri duhet të na e kishte kursyer këtë lajm të rremë, dhe se gjithë këtë tymnajë e ka krijuar ai vetë.
Sipas burimeve të tij, fotoja është e vërtetë, e ndërsa takimi është thjeshtë një mashtrim. Duke analizuar mesazhin e Ramës dhe suksesin që përcjell pas kësaj fotoje, Mustafa Nano thotë se kjo foto vlen aq sa për ta futur në një kornizë.
“Prandaj, zhurma mbi një takim të Ramës me Trumpin është e rremë. Dhe burimi i kësaj zhurme është Rama vetë. Ai duhet të na i kishte kursyer këtë fake-news. Fotografia është e vërtetë, ndërsa takimi është gënjeshtër. Por as fotografia nuk përbën lajm.
Sepse të gjithë e dimë se si e për se bëhen fotografi të tilla. E prandaj, as atë fotografinë nuk ka pse të na i dërgojë si sukses të vizitës në OKB. Është thjesht një fotografi. E cila do t’i vlejë Ramës për ta futur në një kornizë, e për ta varur në shtëpi a në zyrë. Vlerë tjetër ajo fotografi nuk ka”, deklaroi Nano.
Pas publikimit të fotos, Rama pretendonte se ka zhvilluar një bisedë më Donald Trump, i cili i ka thënë se “Shqipëria po ecën shumë mirë”.
