Kryeministri Edi Rama ndodhet në Xarrë, ku po zhvillon një takim me fermerët e zonës. Gjatë fjalës së tij, Rama kërkoi t’i jepet fund historive të blerjes së votës dhe ndarjes së “tepsisë”.
Gjithashtu, Rama thumboi LSI-në, teksa u tha qytetarëve që të votojnë Partinë Socialiste pa e ngatërruar me “lloj-lloj partish” dhe më pas mund t’i kërkojnë llogari kreu të saj.
FJALA E RAMËS:
Vetëm ne mund të bëjmë shtet. Kudo ku ka njerëz që punojnë me tokën, do sigurojmë të mos ketë as papunësi, as varfëri, por të ketë mbështetje për to. Në këto muaj ne ndalëm një hemorragji të madhe në çdo sektor.
25 qershorin ta mendojmë jo si ditë tifozllëku, por si ditën ku do të marrim një vendim historik për ta ngritur flamurin tonë në oborrin e BE-së.
Nuk mund të vazhdojmë me historia të blerjeve të votave e më pas mblidhen në Tiranë për ta ndarë tepsinë. Kjo është një histori e vjetër, 27 vjet. Ne duhet ta ndalojmë, këtë mund ta bëjë vetëm populli me votë. Kjo është një histori që rrënjët i ka te copëzimi i votës. Ne sot kemi të gjitha mundësitë që të bashkuar, jo për t’u bërë të gjithë socialistë e të majtë, por për vizionin që kemi për të bërë shtet, meritojmë votë për të na vënë në një provë zjarri pa na ngatërruar me lloj-lloj tjerësh që pastaj duhet t’i mbajmë në prehër e më pas duan një dorë në timon, e të ndalojnë sa herë të duan për interesat e tyre.
Qendra e votimit nuk është stadium./ Tirana Today